Liverpool saknar ekki Suarez - tölurnar tala sínu máli

Liverpool er eitt á toppi ensku úrvalsdeildarinnar eftir 1-0 sigur á Englandsmeisturum Manchester United í gær en Liverpool hefur unnið þrjá fyrstu leiki sína og alla með sigurmarki frá Daniel Sturridge.

Mörgum þykir enn merkilegra að Liverpool sé að ná bestu byrjun félagsins í 19 ár án stjörnuleikmannsins Luis Suarez. Úrúgvæmaðurinn er enn að taka út refsingu sína fyrir að bíta Chelsea-manninn Branislav Ivanović en Suarez fékk tíu leikja bann.

Luis Suarez fór á kostum með Liverpool á síðasta tímabili og var langmarkahæsti leikmaður liðsins. Það höfðu því margir stuðningsmenn Liverpool áhyggjur af gengi liðsins þegar hann fékk sitt fyrsta leikbann á síðustu leiktíð - fyrir sitt fimmta gula spjald í desember.

Annað hefur komið á daginn og það er fróðlegt að bera saman gengi Liverpool með og án Luis Suarez síðan í janúarmánuði. Liverpool hefur nefnilega náð í 90 prósent stiga í boði án stjörnuframherja síns og hefur haldið miklu oftar hreinu en með hann inn á vellinum.

Hér munar vissulega miklu um frábæra frammistöðu þeirra Daniel Sturridge og Philippe Coutinho sem hafa skorað saman ellefu mörk í þessum átta leikjum sem Suarez hefur verið fjarverandi.

Tölfræðin er byggð á úttekt stuðningsmannasíðu Liverpool, This is Anfield, fyrir leik Liverpool og Manchester United um helgina.



Tölfræði Liverpool með og án Suarez frá því í janúar:



Suarez í byrjunarliði Liverpool:

Manchester City-Liverpool 2-2

Liverpool-West Bromwich Albion 0-2

Liverpool-Swansea 5-0

Wigan-Liverpool 0-4

Liverpool-Tottenham 3-2

Southampton-Liverpool 3-1

Aston Villa-Liverpool 1-2

Liverpool-West Ham United 0-0

Reading-Liverpool 0-0

Liverpool-Chelsea 2-2

Samtals:16 stig af 30 mögulegum, 53 prósent stiga í boði, haldið hreinu 4 sinnum og markatalan er +7.



Suarez ekki í byrjunarliði Liverpool:

Newcastle - Liverpool 0-6

Liverpool-Everton 0-0

Fulham-Liverpool 1-3

Liverpool-QPR 1-0

Liverpool-Stoke City 1-0

Aston Villa-Liverpool 0-1

Liverpool-Mancheser United 1-0

Samtals:19 stig af 21 mögulegu, 90 prósent stiga í boði, haldið hreinu 6 sinnum og markatalan er +12.