Suarez fær ekki að æfa með samherjum sínum

Brendan Rodgers, stjóri Liverpool, segir að Luis Suarez hafi sýnt félaginu algjöra óvirðingu með nýjasta útspili sínu.

Rodgers hefur hafnað kröfu Suarez þess efnis að samkomulag hafi verið fyrir hendi að Úrúgvæinn mætti yfirgefa Anfield í sumar. Þá hafa Samtök atvinnuknattspyrnumanna í Englandi stigið fram og sagt að ekkert í samningi Suarez við Liverpool segi að hann megi yfirgefa félagið berist 40 milljóna punda boð í hann.

Rodgers var grjótharður í afstöðu sinni í málinu að loknum sigri Liverpool á Vålerenga í æfingaleik í Noregi í gær. Hann sagði að Suarez yrði að biðjast opinberlega afsökunar áður en til greina kæmi að hann spilaði fyrir Liverpool á ný.

„Það voru engin loforð, alls ekki og því hafa engin loforð verið brotin," sagði Rodgers. „Félagið átti fjölmörg samtöl við fulltrúa Suarez og því vita allir hvernig í pottinn er búið."

Rodgers sagðist líta málið alvarlegum augum og ætla að bregðast harkalega við.

„Félaginu hefur verið sýnd vanvirðing, félagi sem hefur gefið honum allt, gjörsamlega allt."

Suarez hefur sagst vera tilbúinn að leggja fram formlega beiðni um að fara á sölulista í vikulok. Rodgers segir að Liverpool muni aðeins selja Suarez fyrir sanngjarna upphæð sem talin er vera hærri en 50 milljónir punda.