Rodgers: Luis Suarez er ekki stærri en Liverpool

Brendan Rodgers, knattspyrnustjóri Liverpool, virðist vera búinn að fá sig fullsaddan af hegðun Úrúgvæmannsins Luis Suarez. Suarez setur mikla pressu á forráðamenn Liverpool að selja sig til Meistaradeildarfélags.

Rodgers lét ýmislegt flakka eftir 4-1 sigur Liverpool á norska liðinu Valerenga í æfingaleik í Noregi í kvöld.

„Við höfum ákveðinn standard hjá Liverpool og ég mun fórna lífi mínu til þess að verja félagið. Það verður aldrei leikmaður hjá félaginu sem er stærri en klúbburinn," sagði Brendan Rodgers og beindi orðum sínum augljóslega til Suarez.

„Liverpool-leiðin snýst um félag með metnað og félag sem ætlar alltaf að ná hámarksárangri. Það þýðir að allir í klúbbnum eru sameinaðir í því að berjast fyrir Liverpool-treyjuna," sagði Rodgers.

„Þetta snýst líka um virðingu og að kunna sig þegar menn tjá sig um félagið utan og innan vallar. Við erum í þessu saman," sagði Rodgers.

„Þetta er félag sem hefur gefið Luis Suarez allt sem hann óskaði síðan að hann gekk fyrst inn um dyrnar. Það hafa allir staðið á bak við hann, leikmenn, starfsmenn og stuðningsmenn. Suarez fékk meira að segja frábærar móttökur í góðgerðaleik Steven Gerrard á dögunum," sagði Rodgers.