Reading á toppinn í ensku b-deildinni - Le Fondre hetjan gegn Leeds

Adam Le Fondre kom inn á sem varamaður á 69. mínútu og tryggði Reading dýrmætan 2-0 sigur á tíu mönnum Leeds í ensku b-deildinni í fótbolta með því að skora tvö mörk á síðustu sex mínútum leiksins. Sigurinn kemur Reading jafnframt toppsætið í ensku b-deildinni því liðið er nú með tveggja stiga forskot á Southampton sem á reyndar leik inni á morgun.

Reading-liðið hefur verið í miklum ham síðustu vikur en þetta var tólfti sigur liðsins í síðustu fjórtán deildarleikjum. Það hjálpaði liðinu þó vissulega mikið að spila manni fleiri í 77 mínútur.

Zac Thompson hjá Leeds fékk rauða spjaldið strax á 13. mínútu fyrir glæfralega tæklingu á Jem Karacan en þetta var fyrsti leikur Thompson í byrjunarliðinu síðan að Neil Warnock tók við liðinu. Leeds gat líka þakkað fyrir að enda ekki hálfleikinn tveimur mönnum færri.

Reading var miklu meira með boltann en það voru gestirnir í Leeds sem fengu bestu færin framan af leik. Ross McCormack átti skot stöng og lagði síðan upp dauðafæri fyrir Robert Snodgrass sem Snodgrass fór illa með.

Sóknarþungi Reading jókst þegar á leið leikinn. Varamaðurinn Adam Le Fondre skoraði mark sem dæmt var af vegna rangstöðu en það leið ekki langur tími þar til að hann skoraði löglegt mark.

Adam Le Fondre "kassaði" þá boltann inn af marklínunni á 84. mínútu eftir skallasendingu frá Hal Robson-Kanu. Þetta var í þriðja sinn í síðustu átta leikjum sem hann kemur inn á sem varamaður og skorar.

Le Fondre bætti síðan við öðru marki á 90. mínútu þegar hann var réttur maður á réttum stað í markteignum eftir fyrirgjöf frá Jason Roberts.