Redknapp: Scott Parker gæti misst af EM í sumar

Harry Redknapp, stjóri Tottenham, óttast það að hásinarmeiðsli Scott Parker gætu kostað hann Evrópumótið í sumar. Parker missti af leik Tottenham í lokaumferð ensku úrvalsdeildarinnar um helgina en liðið tryggði sér þá fjórða sætið í deildinni með 2-0 sigri á Fulham.

„Hann fær sprautu á mánudaginn (í dag) og þeir vona að hann verði í lagi eftir sex til sjö daga hvíld," sagði Harry Redknapp í viðtali við BBC.

„Ef hann þarf að fara í aðgerð þá verður hann lengi frá. Við verðum bara að bíða og sjá til hvernig hann verður," bætti Redknapp við.

Scott Parker var fyrirliði enska landsliðsins í vináttulandsleik á móti Hollandi í febrúar en Roy Hodgson, nýr þjálfari enska landsliðsins, mun tilkynna EM-hópinn sinn á miðvikudaginn.

Hér fyrir ofan má sjá myndband frá sigri Tottenham í gær.