Allar líkur á því að Roy Hodgson taki við enska landsliðinu í dag

Allar líkur eru á því að enska knattspyrnusambandið, FA, greini frá því í dag að Roy Hodgson verði næsti þjálfari enska landsliðsins. Hodgson fundaði með FA í gær í fjórar klukkustundir. Samkvæmt heimildum enskra fjölmiðla mun hann stýra liði WBA í ensku úrvalsdeildinni í síðustu tveimur umferðunum áður en hann tekur við liði Englands sem leikur í úrslitakeppni Evrópumeistaramótsins sem hefst í byrjun júní í Póllandi og Úkraínu.

Ítalinn Fabio Capello hætti sem kunnugt er störfum sem þjálfari enska landsliðsins fyrr á þessu ári – eftir samstarfsörðugleika við stjórn FA.

Hinn 64 ára gamli Hodgson hefur mikla reynslu af starfi landsliðsþjálfara en hann náði góðum árangri með landslið Finnlands á sínum tíma. Hann hefur einnig þjálfað landslið Sviss og Sameinuðu arabísku furstadæmana. Hann var þjálfari Inter á Ítalíu og síðustu árin hefur hann verið knattspyrnustjóri hjá liðum í ensku úrvalsdeildinni, Fulham, Liverpool og WBA.

Samkvæmt heimildum Daily Mail mun FA jafnvel greina frá ráðningu Hodgson á fundi með fréttamönnum í dag.