Björn Bergmann og Eggert Gunnþór spiluðu í tapi Úlfanna

Íslensku landsliðsmennirnir, Björn Bergmann Sigurðarson og Eggert Gunnþór Jónsson komu báðir við sögu í 2-0 tapi liðsins í æfingaleik gegn úrvalsdeildarliði Southampton nú fyrr í dag.

Björn Bergmann spilaði allan leikinn fyrir sína menn og þótti sprækur í fremstu víglínu liðsins. Eggert Gunnþór kom inn á sem varamaður og spilaði síðustu tíu mínúturnar í leiknum.

Leikurinn er liður í undirbúningstímabili Úlfanna en liðið spilar sinn fyrsta leik í ensku fyrstu deildinni þann 18. ágúst gegn gamla stórveldinu, Leeds United.

Þess má til gamans geta að í gær voru treyjunúmer liðsins kynnt og kemur Björn til með að spila í treyju númer 15 á meðan Eggert er númer 2.