Mótmælaherferð í Liverpool

Hópur sem kallar sig „Spirit of Shankly" stendur fyrir mótmælaherferð í Liverpool vegna amerískra eigenda félagsins, George Gillett og Tom Hicks.

Fjöldi stórra borða hafa sprottið upp víðsvegar um borgina til að þrýsta á þá Gillett og Hicks að losa sig við félagið. „Tom og George, skuldir, lygar, kúrekar. Ekki velkomnir hér," stendur meðal annars á borðunum.

Félagið er í erfiðum málum fjárhagslega vegna eigenda sinna sem hafa ekki staðið við loforð um nýjan 60 þúsund manna leikvang í Stanley Park.

„Áður takmörkuðum við mótmæli okkar við leikdaga en nú leggjum við allt að veði," sagði talsmaður samtakana. Einhverjar sögusagnir hafa verið uppi um að stuðningsmenn Liverpool sameinist stuðningsmönnum Manchester United í mótmælum en í Manchester eru menn einnig óánægðir með skuldirnar sem bandarískir eigendur félagsins komu með.

„Það er ekkert til í þessum sögum. Sú hugmynd að stuðningsmenn Manchester United og Liverpool gangi sama veg er aldrei að fara að rætast," sagði talsmaðurinn.