Landsliðsþjálfarinn enski lætur ekki vaða yfir sig

Ensku götublöðin News of the World og Daily Mail hafa beðið enska landsliðsþjálfarann Fabio Capello formlega afsökunar á myndum sem birtust af honum á dögunum.

Á myndunum sást Capello spranga um á baðströnd ásamt eiginkonu sinni og þótti landsliðsþjálfaranum þær óviðeigandi. Enska knattspyrnusambandið fór því í málið af beiðni Capello og niðurstaðan í málinu varð sú að umrædd dagblöð báðust formlega afsökunnar og lofuðu að virða einkalíf landsliðsþjálfarans í framtíðinni.

Capello fékk það jafnframt í gegn að dagblöðin myndu borga þær skaðabætur sem hann átti að fá, til Sir Bobby Robson stofnunarinnar.

Stofnunin var eins og nafnið gefur til kynna stofnuð af Sir Bobby Robson, fyrrum landsliðsþjálfara Englands, sem dó nýverið eftir áralanga baráttu við krabbamein. Stofnunin safnar peningum sem notaðir eru til ýmissa krabbameinsrannsókna á Englandi.