Liverpool slapp með skrekkinn

Liverpool mátti þakka fyrir að sleppa með eitt stig í dag þegar liðið tók á móti Arsenal á Anfield. Frábærum leik liðanna lauk með 1-1 jafntefli og því eru þau bæði enn taplaus. Arsenal er komið aftur á toppinn í úrvalsdeildinni.

Þó Arsenal hafi verið sterkari aðilinn í leiknum náði liðið ekki að jafna leikinn fyrr en á 80. mínútu þegar Cesc Fabregas potaði boltanum fram hjá Reina í marki Liverpool eftir glæsilega sendingu frá Alex Hleb.

Áður hafði Steven Gerrard komið Liverpool yfir snemma leiks með sannkölluðum þrumufleyg úr óbeinni aukaspyrnu. Pepe Reina þurfti að taka á honum stóra sínum í marki Liverpool og varði frá Emmanuel Adebayor og svo var skot Tomas Rosicky hreinsað á marklínu.

Í seinni hálfleik átti Emmanuel Eboue skot í stöngina og Fabregas náði ekki að skora úr frákastinu og undir lokin átti Fabregas annað skot í stöngina hjá heimamönnum.

Steven Gerrard var beittastur í liði heimamanna og átt nokkrar góðar skottilraunir að marki Arsenal. Fernando Torres var í byrjunarliði Liverpool í dag en var greinilega aldrei í standi til að spila leikinn og var skipt af velli fyrir Peter Crouch í hálfleik. Crouch átti nokkrar fínar rispur í leiknum en náði ekki að skora eftir að hafa skorað þrennu í þessari viðureign í fyrra.

Arsenal fer því á toppinn í ensku úrvalsdeildinni, er með jafnmörg stig og Manchester United en hefur betra markahlutfall.