Ramos horfði upp á enn eitt tapið hjá Tottenham

Juande Ramos, nýráðinn stjóri Tottenham, horfði upp á liðið tapa enn einum leiknum í dag þegar það lá 2-1 fyrir Blacburn á heimavelli. Ramos stýrir liðinu í fyrsta skipti í næstu viku, en varð vitni að átakanlega dæmigerðri frammistöðu liðsins í dag.

Robbie Keane náði forystu fyrir heimamenn á 49. mínútu þegar hann skoraði úr vítaspyrnu eftir að brotið hafði verið á Aaron Lennon innan teigs.

Benni McCarthy jafnaði fyrir Blackburn á 60. mínútu þegar skot hans hrökk af Michael Dawson og í netið og það var svo Christopher Samba sem slökkti í áhorfendum á White Hart Lane með þrumufleyg í uppbótartíma - dæmigert fyrir gengi Tottenham í haust.

Blackburn er hinsvegar á fínni siglingu í deildinni og vann þarna sinn fjórða sigur í röð.

Fyrr í dag vann Everton 2-0 útisigur á Derby þar sem mörk frá Mikel Arteta og Yakubu tryggðu að Derby sæti áfram á botni úrvalsdeildarinnar. Derby hefur nú ekki skorað mark í meira en fimm klukkustundir í deildinni.