Tölfræði úr ensku úrvalsdeildinni

Enska úrvalsdeildin heldur utan um marga skemmtilega töfræðiþætti sem ekki eru alltaf í umræðunni. Paul Scholes hjá Manchester United er þannig t.d. í algjörum sérflokki þegar kemur að fjölda sendinga.

Scholes hefur gefið 790 sendingar í leikjum United til þessa - talsvert fleiri en Cesc Fabregas hjá Arsenal sem er í öðru sæti (558) og Rio Ferdinand sem er í þriðja sæti (542). Næstir koma Dietmar Hamann hjá City með 527 sendingar og Mathieu Flamini hjá Arsenal með 464 sendingar.

Coker tæklar grimmt 

Nigel Reo-Coker hjá West Ham er grimmasti tæklarinn í deildinni og var reyndar rekinn af velli í síðasta leik fyrir tilþrif sín á því sviði. Coker hefur farið í 46 tæklingar það sem af er móti og þar af heppnuðust 78% þeirra. Dietmar Hamann hefur farið í 42 tæklingar og heppnuðust 81% þeirra. Gael Clichy hjá Arsenal er með ótrúlega tölfræði í þessum efnum. Hann hefur farið í fimmtu flestu tæklingarnar (35) og hefur unnið 97% þeirra.

James ver flest skot 

David James hjá Portsmouth er með flestar markvörslur í deildinni (42) og ver 78% skota sem á hann koma. Marcus Hahnemann hjá Reading kemur næst með 38 markvörslur en aðeins 63% markvörslu - sama hlutfall og Stephen Bywater hjá Derby sem hefur varið 37 skot. Brad Friedel hjá Blackburn er með besta hlutfallið af þessum efstu mönnum en hann hefur varið 33 skot - 80% þeirra sem á hann hafa komið.

Boateng grófastur 

El Hadji Diouf hjá Bolton er áberandi í tölfræði úr ensku úrvalsdeildinni og hann á bæði flestar fyrirgjafir í deiildinni (119) og flest hlaup með bolta (50). Dimitar Berbatov hjá Tottenham hefur oftast verið dæmdur rangstæður (21), George Boateng hjá Middlesbrough hefur brotið oftast af sér (26) og Middlesbrough hefur brotið oftast af sér af öllum liðum (152).