Ferguson: Framtíð Smith og Rossi óráðin

Sir Alex Ferguson viðurkennir að framtíð framherjanna Alan Smith og Giuseppe Rossi gæti legið frá Old Trafford í sumar ef Manchester United nær að klófesta Carlos Tevez frá West Ham. Báðir hafa verið orðaðir við fjölda liða í sumar, en Ferguson ítrekar að þeir séu báðir samningsbundnir United þangað til annað kemur í ljós.

"Við höfum fengið tilboð í Rossi sem setur okkur í nokkuð erfiða stöðu og svo átti Smith góða endurkomu í liðið á síðustu leiktíð, en hann er kominn í þá stöðu að hann vill fá að spila reglulega. Hann gaf liðinu mikið þegar hann sneri aftur í fyrra með baráttu sinni og góðum anda, en hann er orðinn 26 ára gamall og vill spila reglulega. Ef einhver á borð við Tevez kemur svo hingað í sumar - verður klárlega erfið staða uppi á borðinu fyrir Smith og Rossi. Það sem skiptir samt mestu máli að spilin eru í okkar höndum og við getum tekið þær ákvarðanir sem við viljum," sagði Ferguson.

Alan Smith er talinn eftirsóttur af liðum á borð við Middlesbrough, en vitað er að Parma vill kaupa Rossi eftir að hann stóð sig mjög vel á lánssamningi hjá liðinu á síðustu leiktíð.