Vann bráðabanann eftir að hafa beðið lengi í klúbbhúsinu

23 ára Japaninn Shiho Kuwaki vann sitt fyrsta risamót í dag þegar hún náði að vinna umspil gegn Esther Henseleit. Kuwaki kláraði sinn hring snemma og þurfti að bíða lengi í klúbbhúsinu til að fá staðfestingu á því hvort hún myndi vinna mótið.

Sigurinn virtist vera að sigla í höfn þangað til þýski kylfingurinn Esther Henseleit hitti úr þrettán metra pútti fyrir fugli og endaði jöfn Kuwaki á fimm höggum undir pari. Því var ljóst að úrslitin réðust í bráðabana.

Á fyrstu umspilsholunni náðu bæði Kuwaki og Henseleit pari en Henseleit fékk skolla á annarri umspilsholunni eftir að upphafshöggið hennar fór í ökkla á öryggisverði. Kuwaki fékk öruggt par og vann því sitt fyrsta risamót á ferlinum.

Yealimi Noh var með þriggja högga forskot fyrir hringinn í dag en spilaði ekki vel í dag. Hún spilaði hringinn í dag á þremur höggum yfir pari og endaði í þriðja sæti. Hún var samtals alla fjóra hringina á fjórum höggum undir pari og var því aðeins einu höggi frá því að fara í bráðabanann.

Nelly Korda sem er efst á heimslistanum fór upp um tólf sæti eftir daginn í dag þar sem hún spilaði hringinn á þremur höggum undir pari. Hún endaði mótið í fjórða sæti á tveimur höggum undir pari eftir alla fjóra hringina.