Sagðist vera hryðjuverkamaður í flugvél SAS

Flugvél SAS-flugfélagsins sem stödd var í Björgvin var rýmd í morgun vegna þess að farþegi um borð lýsti því yfir að hann væri hryðjuverkamaður.

Eftir því sem fram kemur á vef norska ríkisútvarpsins var það fólk úr áhöfn flugvélarinnar sem heyrði á tal mannsins en hann sagði jafnframt að það væri sprengja um borð. Tók flugstjórinn enga áhættu og var maðurinn fluttur frá borði án mótþróa og í kjölfarið var vélin rýmd.

Maðurinn, sem er króatískur sjómaður á fertugsaldri, viðurkenndi við yfirheyrslur að hann hefði verið að gantast en engu að síður var sprengjusveit kölluð til til að rannsaka flugvélina. Maðurinn verður ákærður fyrir uppátækið en hann mun hafa verið á leið til heimalands síns með viðkomu í Kaupmannahöfn en flugvélin var á leið þangað. Finna varð nýja flugvél til að flytja aðra farþega þangað.