Markalaust hjá Blackburn og Liverpool

Blackburn og Liverpool skildu jöfn í markalausum leik á Ewood Park í dag. Blackburn fór með stiginu upp að hlið Portsmouth og Manchester City í 4.-6. sæti deildarinnar.

Liverpool er í sjöunda sæti deildarinnar með 21 stig, einu stigi á eftir fyrrgreindu liðunum.

Liverpool er þó enn taplaust en hefur nú gert sex jafntefli í ellefu leikjum. Þetta var fimmta jafntefli liðsins í undanförnum sjö leikjum eða síðan að Liverpool vann stórsigur á Derby á heimavelli, 6-0.

Peter Crouch fékk ekki sæti í byrjunarliðinu þrátt fyrir að hann hafi staðið sig ágætlega í leiknum gegn Arsenal í síðustu viku. Rafa Benitez, stjóri Liverpool, ákvað þess í stað að hafa Dirk Kuyt einan upp á topp.

Momo Sissoko kom í stað Xabi Alonso á miðjunni en hann á við meiðsli að stríða. Yossi Benayoun og Ryan Babel voru einnig í byrjunarliðinu.

Hjá Blackburn gerði Mark Hughes tvær breytingar en fyrirliðinn Ryan Nelsen er kominn aftur í liðið sem og Norðmaðurinn Morten Gamst Pedersen.

Leikurinn fór afar rólega af stað eftir afar fjörugan dag í ensku úrvalsdeildinni í dag. Blackburn fékk gott færi undir lok hálfleiksins þegar David Bentley skaut í stöngina á marki Liverpool eftir laglegan undirbúning Pedersen.

David Dunn átti svo þrumuskot í slána en en heppnin var með Liverpool í fyrri hálfleik í dag. Meira gerðist ekki markvert í fyrri hálfleiknum.

Blackburn átti betri færi í upphafi síðari hálfleiks en færði sér þau ekki í nyt. Það voru hins vegar gestirnir frá Liverpool sem voru nærri því að skora undir lok leiksins og þá sérstaklega Dirk Kuyt.

Hann skapaði sér gott svæði á hægri vængnum og kom inn í teiginn í góðu færi. Hann misskildi hins vegar eitthvað hlaup Steven Gerrard og rétti nánast Brad Friedel markverði Blackburn boltann. 

Gerrard átti svo skot sem Freidel varði eftir undirbúning Kuyt og þá bjargaði Bentley á línu frá varamanninum Peter Crouch.  

Friedel varði svo vel frá Gerraard þegar Gerrard á fast skot að marki eftir undirbúning Crouch.  

Skömmu síðar átti svo Kuyt skot sem fór himinhátt yfir mark Blackburn úr góðu færi.

Nær komst Liverpool þó ekki. Það var þó jákvætt fyrir þá rauðklæddu að Harry Kewell lék sinn fyrsta leik á tímabilinu í dag er hann kom inn á sem varamaður.