Jol: Berbatov er ekki í fýlu

Bresku blöðin gerðu sér mat úr því í morgun að framherjinn Dimitar Berbatov hefði farið í fýlu af því hann var ekki í byrjunarliði Tottenham gegn Newcastle í gærkvöldi, en Martin Jol gaf skýringu á því í morgun.

"Ég hef heyrt að menn hafi haldið því fram að Berbatov hafi farið í fýlu en það er vitleysa. Við eigum fyrir höndum fimm leiki á þrettán dögum og ég þarf mikið á Berbatov að halda í þessum leikjum. Við eigum mikilvægan leik fyrir höndum gegn Getafe í Evrópukeppninni á fimmtudaginn og ég veit ekki hvaðan svona slúður kemur," sagði Jol.

Tottenham varð fyrir öðru áfalli í 3-1 tapinu gegn Newcastle í gær þegar unglingurinn Gareth Bale meiddist á fæti þegar stigið var á hann. "Ég vona að hann verði ekki lengi frá því við eigum mikið af leikjum á næstu dögum. Hann var mjög bólginn á fætinum í gær en vonandi nær hann sér fljótt," sagði Jol.