Íhuga rannsókn á Halliburton

Dómsmálaráðuneyti Bandaríkjanna tekur senn ákvörðun um hvort rannsaka eigi ásakanir um að fyrirtækið Halliburton, sem Dick Cheney, varaforseti Bandaríkjanna stýrði eitt sinn, hafi fengið hagstæða samninga í Írak með vafasömum hætti.

Dick Cheney var forstjóri Halliburton á árunum 1995 til 2000, en lét af störfum þegar hann bauð sig fram til varaforseta. Í fyrra gagnrýndu embættismenn hjá Bandaríkjaher hvernig staðið var að samningum við Halliburton, til dæmis að fyrirtæki í eigu þess fékk samning um að endurreisa olíuiðnað Íraks án þess að útboð færi fram.

Talsmenn Halliburton verjast fregna af málinu, en segjast vilja sýna dómsmálaráðuneytinu fullan samstarfsvilja.