Stefnuræða Bidens: Fór hörðum orðum um Trump en nefndi hann aldrei á nafn

Þá svaraði hann nokkrum sinnum köllum þingmanna Repúblikana úr þingsalnum.

Með ræðunni vonuðu Biden og ráðgjafar hans að hann gæti sýnt aðra hlið á sér en þá sem Repúblikanar hafa málað. Hann væri ekki of gamall til að takast á við starfið og réði við annað kjörtímabil. Biden er 81 árs.

Stefnuræður snúast iðulega um hvaða markmið hafa náðst á undanförnu ári og markmið komandi árs. Óhætt er að segja að þetta hafi ekki verið hefðbundin stefnuræða. Biden hóf gagnrýni sína í garð Trumps mjög snemma í ræðunni og lenti oft í orðaskaki við þingmenn Repúblikana.

Sjá einnig: Biden situr á digrum sjóðum en Trump ver fúlgum í lög­menn

Meðal annars sakaði Biden „forvera sinn“ eins og hann kallaði Trump ítrekað, án þess að nefna hann á nafn, um að ógna réttindum og frelsi Bandaríkjamanna og lýðræði Bandaríkjanna. Hann sagði meðal annars að ógnin hefði ekki verið meiri frá tímum Abraham Lincoln og þrælastríðsins.

„Það sem gerir okkar tíð sérstaka er að frelsinu og lýðræðinu er ógnað bæði hér heima og erlendis, á sama tíma,“ sagði Biden.

Forsetinn gagnrýndi Repúblikana einnig, fyrir undirlægjuhátt þeirra í garð Trumps og fyrir að styðja ekki frumvarp um aðgerðir á landamærum Bandaríkjanna og Mexíkó, sem þeir komu sjálfir að því að semja, því Trump sagðist vilja nota krísuna á landamærunum í kosningabaráttu sinni gegn Biden.

Forsetinn gagnrýndi Repúblikana einnig fyrir að taka undir lygar Trumps um að forsetakosningunum 2020 hefði verið stolið, svo eitthvað sé nefnt.

„Þið getið ekki bara elskað land ykkar þegar þið vinnið,“ sagði Biden.

Biden gagnrýndi Trump og Repúblikana harðlega fyrir aðgerðir þeirra gegn þungunarrofi og stefnumál þeirra sem snúa að skattlagningu og heilbrigðismálum. Hann sagði þá ekki með puttann á púlsi þjóðarinnar.

Forsetinn státaði sig einnig af velgengni sinni á ýmsum sviðum og nefndi sérstaklega fjárveitingar til framleiðslu tölvuflaga í Bandaríkjunum. Þá notaði hann tækifærið til að skjóta á þingmenn Repúblikanaflokksins sem greitt hafa atkvæði gegn þeim fjárveitingum og öðrum en samt státað sig af þeim heima fyrir, þegar peningarnir byrja að flæða inn í kjördæmi þeirra.

Þá kallaði Biden eftir því að þingið samþykkti hernaðaraðstoð handa Úkraínumönnum, sem Repúblikanar í fulltrúadeildinni, þar sem þeir eru með nauman meirihluta, hafa neitað að samþykkja um mánaðaskeið. Hernaðaraðstoð var innifalin í áðurnefndu frumvarpi um aðgerðir á landamærum Bandaríkjanna og Mexíkó en forsvarsmenn Repúblikanaflokksins í fulltrúadeildinni hafa ekki leyft atkvæðagreiðslu um frumvarpið.

Gífurleg óreiða hefur ríkt í fulltrúadeildinni á þessu kjörtímabili og hafa sögulega fá frumvörp verið samþykkt þar.

Fyrstu kannanir fjölmiðla vestanhafs gefa til kynna að kjósendur hafi litið ræðu Bidens jákvæðum augum.

Hér að neðan má sjá samantekt PBS Newshour um helstu kafla ræðu Bidens í gær. Áhugasamir geta séð alla ræðuna hér.

Tilfinningaþrungið svar

Katie Britt, öldungadeildarþingmaður Repúblikanaflokksins frá Alabama, flutti svokallaða svarræðu við ræðu Bidens í gær. Ræðan var nokkuð tilfinningaþrunginn og virtist Britt á köflum gráti næst en hún fór einnig nokkuð frjálslega með sannleikann á öðrum köflum.

Þar hélt hún því fram að bandaríski draumurinn svokallaði hefði breyst í martröð fyrir margar fjölskyldur Bandaríkjanna.

Britt sagði Biden og demókrata ganga erinda glæpamanna og verja þá. Fyrir vikið væru Bandaríkin að verða sífellt hættulegri. Tölfræði sýnir þó að alvarlegir glæpir hafa ekki orðið tíðari í borgum Bandaríkjanna. Þvert á móti hefur þeim fækkað, nánast alls staðar, á undanförnum árum.

Hún sagði Bandaríkin á undanhaldi og lýsti Biden sem veikum leiðtoga. Hann gæti ekki staðið vörð um landamæri Bandaríkjanna og sakaði hún hann um að bera fulla ábyrgð á ástandinu á landamærum Bandaríkjanna og Mexíkó.

Hér að neðan má sjá samantekt AP fréttaveitunnar úr ræðu Britt.