„Það er eitt sem mér finnst að KSÍ mætti fara að skoða“

Valsmenn hafa verið á mikilli siglingu en voru í álíka langri pásu og Stjörnumenn fyrir sigur sinn á Fylki í síðustu viku. Aron gagnrýnir hversu langt sé á milli leikja, sérstaklega um hásumarið þegar aðstæður eru hvað bestar til knattspyrnuiðkunar.

„Okkur líður vel. Við erum búnir að vera að spila þokkalega vel en kannski eins og á móti Fylki, þar sem aðalatriðið var að fá þrjú stig, en erum kannski ekki alveg nógu ánægðir með spilamennskuna á köflum. Við vorum náttúrulega að koma úr þriggja vikna sumarfríi um hásumar,“

„Það er eitt sem mér finnst að KSÍ mætti fara að skoða, hvernig stendur á því að lið séu í þriggja vikna pásum hérna hægri, vinstri, á miðju sumri þegar veðrið er sem best. Það er mikið talað um að lengja tímabilið þá er skrýtið að maður sé í svona löngum pásum um hásumar,“ segir Aron.

Hann kveðst þó spenntur fyrir leiknum en Stjarnan vann afar góðan 5-0 sigur á FH í síðasta leik sínum fyrir pásuna.

„Þetta leggst mjög vel í mig. Stjarnan er náttúrulega með mjög gott lið og ég held að helmingurinn af hópnum þeirra sé í öllum þessum yngri landsliðum. Svo í bland við það eru þeir með reynslumikla leikmenn sem hafa verið í deildinni í tugi ára. Mér finnst hafa verið stígandi í þeirra liði undanfarið og þetta verður hættulegur leikur fyrir okkur,“ segir Aron.

Leikur Stjörnunnar og Vals hefst klukkan 19:15 í kvöld og verður sýndur beint á Stöð 2 Sport.