Enski boltinn

Dæmdur í bann fyrir hómófóbískar færslur sem hann skrifaði er hann var átján

Ingvi Þór Sæmundsson skrifar
Peterborough United verður án aðalframherja síns, Jonsons Clarke-Harris, í næstu fjórum leikjum í ensku B-deildinni.
Peterborough United verður án aðalframherja síns, Jonsons Clarke-Harris, í næstu fjórum leikjum í ensku B-deildinni. getty/James Holyoak

Færslur sem Jonson Clarke-Harris, framherji Peterborough United, skrifaði á samfélagsmiðla þegar hann var átján ára hafa nú komið honum í koll, níu árum seinna.

Færslurnar voru fordómafullar í garð samkynhneigðra og enska knattspyrnusambandið hefur dæmt Clarke-Harris í fjögurra leikja bann. Hann fékk einnig 5.300 punda sekt sem jafngildir rúmlega níu hundruð þúsund íslenskra króna.

Clarke-Harris skrifaði færslurnar á samfélagsmiðla á tímabilinu október 2012 til mars 2013 þegar hann var ungur leikmaður á láni hjá Southend United og Bury. Í úrskurði enska knattspyrnusambandsins segir að færslurnar hafi verið móðgandi, grimmar, óviðeigandi og varpað rýrð á íþróttina.

Auk þess að fá bann og sekt þarf Clarke-Harris að sitja endurmenntunarnámskeið. Hann játaði sök í málinu.

Vegna bannsins missir Clarke-Harris af leikjum gegn Coventry, Bournemouth, Bristol City og Middlesbrough í ensku B-deildinni.

Clarke-Harris, sem er 27 ára, lék með Peterborough á árunum 2012-13 og gekk svo aftur í raðir liðsins í fyrra. Hann var markahæstur í ensku C-deildinni á síðasta tímabili með 31 mark.

Peterborough er í 21. sæti ensku B-deildarinnar með sjö stig eftir átta leiki. Clarke-Harris skoraði í 3-0 sigri liðsins á Birmingham City í síðustu umferð.


Championship-deildin er á Stöð 2 Sport en upplýsingar um útsendingar má finna hér. EFL Championship er hluti af Stöð 2 Sport erlent sem kostar 3.990 krónur á mánuði.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.