Enski boltinn

Ronaldo þakklátur Cavani fyrir númerið

Sindri Sverrisson skrifar
Cristiano Ronaldo er ekki alltaf til í að vera í treyjunni sinni þegar hann spilar fótbolta. Hann fékk gult spjald fyrir að fara úr henni þegar hann fagnaði sigurmarkinu gegn Írum.
Cristiano Ronaldo er ekki alltaf til í að vera í treyjunni sinni þegar hann spilar fótbolta. Hann fékk gult spjald fyrir að fara úr henni þegar hann fagnaði sigurmarkinu gegn Írum. EPA-EFE/ANTONIO COTRIM

Cristiano Ronaldo fékk það í gegn að hann myndi klæðast treyju númer sjö, líkt og hann er vanur, eftir endurkomuna til Manchester United. Hann kveðst þakklátur Edinson Cavani fyrir að hafa verið til í að skipta um númer.

Ronaldo gekk í raðir United á nýjan leik frá Juventus á dögunum og skrifaði undir samning til tveggja ára, með möguleika á viðbótarári. Þessi 36 ára gamli Portúgali gæti spilað sinn fyrsta leik fyrir United frá árinu 2009 þegar liðið mætir Newcastle eftir rúma viku.

Til að Ronaldo gæti fengið „sjöuna“, sem margar af helstu goðsögnum United hafa klæðst, varð enska úrvalsdeildin að samþykkja í fyrsta sinn að leikmaður breytti um númer eftir upphaf keppnistímabils. Cavani varð einnig að samþykkja að gefa eftir sjöuna en hann fékk í staðinn númerið 21, sem einmitt hefur verið hans aðalnúmer í gegnum tíðina.

Daniel James var áður númer 21 en var seldur til Leeds. Þar með gekk allt upp fyrir Ronaldo sem hefur byggt upp vörumerkið CR7 á sínum langa og farsæla ferli.

„Ég var ekki viss um að það myndi ganga upp að ég fengi að vera aftur í treyju númer sjö. Þess vegna vil ég þakka Edi [Cavani] fyrir þessa ótrúlegu hjálpsemi,“ sagði Ronaldo.

Ronaldo, sem nú á metið sem markahæsti landsliðsmaður heims frá upphafi með 111 mörk, sneri fyrr en ella til Manchester úr verkefni sínu með portúgalska landsliðinu. Hann fékk gult spjald fyrir að fara úr treyjunni þegar hann fagnaði sigurmarki sínu gegn Írlandi og var þar með kominn í bann fyrir útileik Portúgals gegn Aserbaísjan, í undankeppni HM.


Tengdar fréttir

Ronaldo sendur snemma heim úr landsliðsverkefni

Cristiano Ronaldo var í gær sendur snemma heim úr landsliðsverkefni Portúgal eftir að hann nældi sér í leikbann þegar hann fagnaði marki með því að fara úr treyjunni og fékk gult spjald að launum.

Ronaldo markahæsti landsliðsmaður sögunnar

Cristiano Ronaldo varð í kvöld markahæsti landsliðsmaður karla í fótbolta í sögunni. Tvö mörk hans fyrir Portúgal í 2-1 sigri á Írlandi komu honum efst á þann lista.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.