Erlent

Bregst við mót­mælum með því að skipta út ellefu ráð­herrum

Atli Ísleifsson skrifar
Mótmæli hafa verið tíð á götum Túnisborgar síðustu rúmu vikuna.
Mótmæli hafa verið tíð á götum Túnisborgar síðustu rúmu vikuna. Getty/Jdidi Wassim

Þingið í Túnis samþykkti í gær nýja ráðherra í ríkisstjórn landsins, en forsætisráðherrann Hichem Mechichi vill með breytingunum bregðast við þeirri reiði sem blossað hefur upp í landinu og leitt til mikilla mótmæla síðustu daga.

Mechichi skipti meðal annars út þungavigtarmönnum í ríkisstjórninni og koma meðal annars nýir ráðherrar innanríkismála, heilbrigðismála og dómsmála inn í ríkisstjórnina. Mechichi kveðst vona að með þessu verði ríkisstjórnin „skilvirkari“ í sínum störfum.

Þúsundir manna hafa síðustu daga haldið út á götur til að mótmæla aukinni fátækt í landinu og því sem lýst er sem afskiptaleysi stjórnmálastéttarinnar. Mechichi segir ríkisstjórnina ætla að hlusta á raddir mótmælendanna.

Hrókeringarnar í ríkisstjórninni hafa þó einnig leitt til aukinnar togstreitu milli forsætisráðherrans og forsetans Kais Saied. Saied segist ekkert hafa verið með í ráðum og fullyrðir að sumir hinna nýju ráðherra séu grunaðir um spillingu.

Þegar verið var að staðfesta nýja ráðherra í þinginu héldu sumir stjórnarandstæðingar á myndum af ungum mótmælenda sem lét á dögunum lífið í átökum við lögreglu.

Þessi nýja bylgja mótmæla kemur um svipað leyti og þess er minnst að tíu ár eru nú liðin frá mótmælaöldunnar 2011 sem leiddi til falls einræðisherrans Ben Ali. Mótmælin í Túnis þá voru kveikjan að Arabíska vorinu svokallaða.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×