Enska knattspyrnusambandið breytir reglum sem að lúta að leikmannaviðskiptum

Richard Scudamore, framkvæmdastjóri enska knattspyrnusambandsins hefur breytt reglum sem lúta að leikmannaviðskiptum og segir hann að vandræðin sem sköpuðust í kringum Argentínumanninn, Carlos Tevez, eigi ekki að geta endurtekið sig. Málið varð hið vandræðalegasta fyrir enska sambandið en ekki sá fyrir endann á flækjunni fyrr en West Ham náði skyndilega samkomulagi við umboðsmenn Tevez nú fyrir helgi.

Reglubreytingin felur í sér að félög þurfa nú að afhenda enska knattspyrnusambandinu öll gögn sem til eru varðandi leikmannaviðskipti, hversu lítilfjörleg sem sum gögnin kunna að virðast til þess að fá viðskiptin samþykkt. Þetta gerði West Ham ekki þegar félagið fékk Tevez og landa hans, Javier Mascherano til félagsins í ágúst í fyrra, áður en Íslendingarnir tóku við stjórnartaumum í félaginu.

West Ham var í kjölfarið sektað um fimm og hálfa milljón punda eða 700 milljónir króna fyrir að brjóta reglur knattspyrnusambandsins sem kveða á um að leikmaður megi ekki vera á nokkurn hátt í eigu þriðja aðila. Argentínumennirnir voru þá hjá West Ham á lánssamningi frá brasilíska félaginu Corinthians, og í eigu fyrirtækis íranska viðskiptajöfursins Kia Jorabchian. Þetta er leyfilegt í Suður-Ameríku en ekki á Englandi.

Tevez verður löglegur með Man Utd á næstu tveimur sólarhringum og mun taka þátt í æfingaleik með liðinu á miðvikudaginn