Ferdinand: Ummæli Terry særðu mig

Réttarhöld í máli Antons Ferdinand gegn John Terry hófust í London í dag. Terry er sakaður um að hafa haft kynþáttafordóma í frammi gagnvart Ferdinand í viðureign QPR og Chelsea í ensku úrvalsdeildinni í október síðastliðnum.

Vefsíða enska dagblaðsins Guardian greinir frá gangi mála í réttarsalnum í dag. Eftirfarandi frétt er byggð á frásögn miðilsins á málinu en hana má sjá hér.

Terry neitaði í dag sök í málinu. Hann segir að orð sín, þar sem hann kallaði Ferdinand „andskotans svartan aumingja"*(„fucking black cunt"), hafi í raun verið kaldhæðnislegt svar sitt til Ferdinand eftir að sá síðarnefndi ásakaði sig um ummælin.

Ferdinand sagði hins vegar fyrir dómnum í dag að hann hefði alls ekki tekið eftir ummælum Terry fyrr en að leik loknum. Þá hafi kærasta hans sýnt honum myndband af youtube af umræddu atviki.

Ferdinand minnti Terry á framhjáhaldið með fyrrverandi konu Bridge„Það hefði augljóslega sært mig mikið," sagði Ferdinand aðspurður hvernig hann hefði brugðist við hefði hann heyrt orð Terry á vellinum. Ferdinand sagðist ekki geta kvartað undan því að vera kallaður aumingi. Það tíðkaðist á knattspyrnuvellinum.

„En þegar einhver leggur áherslu á litarhátt þinn er stærðargráðan allt önnur og særir mann mikið," sagði Ferdinand sem fór yfir gang mála á Loftus Road í október.

Að sögn Ferdinand kallaði Terry sig aumingja sem svaraði á móti og minnti Terry á að hann hefði sofið hjá kærustu fyrrverandi liðsfélaga síns, Wayne Bridge, hjá Chelsea.

Þá sagðist Ferdinand hafa gert niðrandi handahreyfingar til merkis um kynlíf til að leggja áherslu á fyrrnefnt ástarsamband Terry og fyrrverandi konu Bridge. Ashley Cole hafi svo komið til Ferdinand eftir leikinn og sagt að hann gæti ekki talað til JT (John Terry) með þessum hætti.

Sættir í búningsklefanum að leik loknum.Ferdinand segist hafa verið beðinn um að ræða við John Terry í búningsklefa Chelsea að leik loknum að ósk Terry. Þar hafi Terry spurt Ferdinand hvort hann teldi Terry hafa haft kynþáttafordóma í frammi.

„Ég sagði nei. Ég sagðist aldrei hafa haldið því fram," segist Ferdinand hafa sagt. Ashley Cole hafi þá ítrekað spurninguna þar sem hann taldi Ferdinand hafa ásakað Terry um kynþáttafordóma í spjalli við sig. Því neitaði Ferdinand einnig.

Að því loknu hafi Terry og Ferdinand samþykkt að um hefðbundinn orðaslag hafi verið að ræða sem ekki þyrfti að dvelja lengur við.

Um klukkustund eftir leikinn segist Ferdinand hafa hitt kærustu sína sem hafi spurt sig um meintan kynþáttaníð Terry. Aftur þverneitaði Ferdinand að hafa orðið fyrir þeim.

Þá hafi kærastan sýnt Ferdinand atvikið á myndbandsupptöku í síma sínum og þá hafi málið tekið nýja stefnu. Ferdinand hafi verið sannfærður um að kynþáttafordómar hafi verið hafðir í frammi.

Málinu verður framhaldið á morgun.