Erlent

Samkomubann Ástrala hert enn frekar

Andri Eysteinsson skrifar
Forsætisráðherra Ástralíu, Scott Morrison
Forsætisráðherra Ástralíu, Scott Morrison Getty/Gary Ramage

Áströlsk stjórnvöld hafa ákveðið að herða á aðgerðum sínum sem ætlað er að sporna við útbreiðslu kórónuveirunnar í landinu. Áður hafði samkomubann verið í gildi sem heimilaði samkomur tíu og færri en nú hefur sú tala verið lækkuð niður í tvo. Guardian greinir frá.

Forsætisráðherra Ástralíu, Scott Morrison, kynnti aðgerðirnar í dag en auk samkomubannsins verður sex mánaða frestur settur á útburð leigjenda, bæði fyrirtækja og einstaklinga vegna fyrirséðra fjárhagserfiðleika í kjölfar áhrifa kórónuveirunnar á samfélagið.

Þá mun ríkisstjórnin aðstoða fyrirtæki við að halda starfsfólki á launaskrá á meðan að ástandið varir.

Leikvöllum, úti-líkamsræktarstöðvum og hjólabrettagörðum verður þá lokað frá og með mánudeginum vegna hertra aðgerða. Enn mega fjölskyldumeðlimir vera saman á gangi þó þeir séu fleiri en tveir en annarskonar samkomur fleiri en tveggja verða bannaðar. Morrison sagði að fólk ætti að halda sig heima nema til þess að versla í matinn, fara í vinnu, hreyfingu eða til læknis.

Tæplega 4000 tilfelli kórónuveirunnar hafa greinst í landinu og þegar hafa 16 látist af völdum hennar.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.