KR varð í gær Reykjavíkurmeistari í 39. sinn eftir sigur á Val í úrslitaleik á Hlíðarenda, 2-0. Arnar Björnsson fór yfir leikinn.



Íslandsmeistarar KR komust yfir á lokamínútu fyrri hálfleiks þegar Kristján Flóki Finnbogason skallaði fyrirgjöf Kennies Chopart í netið.



Á 62. mínútu fékk Valsmaðurinn Sigurður Egill Lárusson sitt annað gula spjald og þar með rautt.



Sex mínútum síðar skoraði Ægir Jarl Jónasson annað mark KR-inga með skalla eftir að boltinn barst til hans í kjölfar hornspyrnu.



Í uppbótartíma fékk Valur vítaspyrnu eftir að Guðjón Orri Sigurjónsson braut á Andra Adolphssyni. Kristinn Freyr Sigurðsson tók spyrnuna en Guðjón greip boltann.



KR og Valur mætast í upphafsleik Pepsi Max-deildar karla 22. apríl.



Fréttina í heild sinni má sjá hér fyrir neðan.