Íslenski boltinn

„Ef þetta verður svona í allt sumar gjaldfellir það mótið“

Ingvi Þór Sæmundsson skrifar
Valur verður væntanlega kominn sex stigum á undan Breiðabliki þegar Kópavogsliðið leikur næst í Pepsi Max-deild kvenna.
Valur verður væntanlega kominn sex stigum á undan Breiðabliki þegar Kópavogsliðið leikur næst í Pepsi Max-deild kvenna. vísir/vilhelm

Nú þegar hefur sex leikjum í Pepsi Max-deild kvenna verið frestað eftir að smit komu upp í liði Breiðabliks og Fylkis. Aðeins tveir af fimm leikjum í 4. umferðinni gátu farið fram og þremur af fimm leikjum í 5. umferðinni hefur einnig verið frestað.

Bára Kristbjörg Rúnarsdóttir, einn sérfræðinga Pepsi Max marka kvenna, segir að ef ástandið vari lengi og það þurfi að fresta leikjum í allt sumar gjaldfelli það tímabilið. 

Hún segir jafnframt að frestanir á leikjum komi hvað verst við Breiðablik sem flestir búast við að berjist við Val um Íslandsmeistaratitilinn

„Þetta hefur gríðarlega mikil áhrif og veldur því að lið þurfa strax að elta. Það getur verið mjög dýrt fyrir Breiðablik, sem er í harðri samkeppni við Val, að missa út tvær vikur,“ sagði Bára í samtali við Vísi.

„Valur og Breiðablik eru í sérflokki og að missa Valskonur fram úr sér núna er mjög slæmt fyrir Blika,“ bætti Bára við. Næst þegar Breiðablik spilar, gegn ÍBV í Eyjum 14. júlí, gæti liðið verið sex stigum á eftir Val.

Stór hluti leikmannahóps KR er í sóttkví og næsti deildarleikur liðsins er ekki fyrr en 14. júlí. KR-ingar hafa farið illa af stað og tapað öllum þremur leikjum sínum. Sömu sögu er að segja af FH-ingum.

„Ég held að þetta hafi mjög vond áhrif á FH og KR. Að mínu mati hafa þetta verið slökustu liðin til þessa. Það er ekki gott fyrir þessi lið að detta úr rútínu. Ég hefði haldið að þau yrðu betri með hverjum leik. En svo getur verið að þetta verði vítamínsprauta fyrir þessi lið,“ sagði Bára.

Staðan er ekki ákjósanleg og sú spurning vaknar hvort frestanir og allt sem þeim fylgir gjaldfelli þetta tímabil.

„Ef þetta er bara smá niðursveifla sem er svo búin held ég að þetta verði allt í lagi. En miðað við hvað smit komu fljótt upp hef ég áhyggjur af því að þetta verði gegnumgangandi í sumar. Og ef það verður gjaldfellir það mótið algjörlega,“ sagði Bára að lokum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.