Íslenski boltinn

Lék í 3. flokki frekar en í Pepsi Max-deildinni

Anton Ingi Leifsson skrifar
Bára Kristbjörg skildi ekkert í því af hverju Jakobína Hjörvarsdóttir var ekki í byrjunarliði Þór/KA í gær.
Bára Kristbjörg skildi ekkert í því af hverju Jakobína Hjörvarsdóttir var ekki í byrjunarliði Þór/KA í gær. vísir/s2s

Hlín Eiríksdóttir átti afbragðsleik gegn Þór/KA í Pepsi Max-deildinni á miðvikudagskvöldið en Bára Kristbjörg Rúnarsdóttir, sérfræðingur Pepsi Max-markanna, skildi ekki af hverju Jakobína Hjörvarsdóttir var ekki í byrjunarliðinu hjá Þór/KA.

Hlín hefur byrjað Pepsi Max-deildina af miklu krafti og segja spekingarnir að hún sé í ansi góðu standi.

„Hún er eins og jarðýta. Það virðist enginn geta ýtt henni eða stigið hana út,“ sagði Bára Kristbjörg og sagði bakvörð Þór/KA, Huldu Hannesdóttur, vera í miklum vandræðum með landsliðskonuna.

„Hún var í miklum vandræðum með hana. Ég er búinn að sjá hana í hinum tveimur leikjunum með Þór/KA og ég tók eftir því að sú er búin að starta hina tvo leikina var ekki í byrjunarliðinu,“ sagði Bára og átti þá við Jakobínu.

„Hún var ekki á skýrslunni svo ég fór að grennslast fyrir um þetta. Hún var búin að spila vel í fyrstu tveimur leikjunum og hún var að spila með 3. flokki daginn áður. Ég var búin að gefa mér það að hún væri meidd en þá fór ég að grennslast nánar.“

Þór/KA hefur sett markmiðið hátt í 3. flokki kvenna og ætla þær sér að verða Íslandsmeistarar en Bára setur spurningarmerki við forgangsröðina.

„Það er víst útgefið markmið hjá Þór/KA að þær ætla að verða Íslandsmeistarar svo þjálfarinn lætur hana spila með 3. flokki í stað þess að byrja inn á í Pepsi Max-deildinni. Fyrir mitt leyti sem þjálfara og áhugamanneskju þá skil ég ekki pælinguna að þetta trompi leik á móti Val.“

„Ég velti fyrir mér hvort að þjálfarinn hafi verið búinn að henda inn handklæðinu fyrst hann gerir þetta og fer fljótlega að taka lykilmenn út af. Af hverju fær þessi stelpa ekki bara starta þennan leik á þessum velli á móti þessu liði og sjá hvort að hún geti stígið upp í það. Ef hún er nógu góð til þess að vera í byrjunarliðinu í hinum leikjunum, af hverju er hún þá í 3. flokki í næsta leik?“ spurði Bára.

Klippa: Pepsi Max-mörk kvenna: Umræða um byrjunarlið Þór/KA


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.