Sjamíl Basajev, uppreisnarleiðtogi frá Tsjetsjeníu, var drepinn í gær í aðgerð rússneskra stjórnvalda, að sögn yfirmanns rússnesku alríkislögreglunnar, Nikolai Patrúsjev.
Patrúsjev tilkynnti Vladimír Pútín Rússlandsforseta, í beinni sjónvarpsútsendingu, að Basajev hefði verið drepinn í næturáhlaupi aðfaranótt mánudags í sjálfstjórnarhéraðinu Ingúsetíu. Basajev var fjörutíu og eins árs að aldri. Auk hans létust margir aðrir uppreisnarmenn í árásinni.
Pútín kallaði morðið "réttláta hefnd" fyrir árásirnar í september 2004, þegar um þrjátíu tsjetsjenskir byssumenn tóku skóla í bænum Beslan í Norður-Ossetíu herskildi og héldu börnum og kennurum í gíslingu. Gíslatakan endaði í blóðbaði tveimur dögum seinna og 331 óbreyttur borgari lét lífið. Basajev lýsti því yfir í kjölfarið að hann bæri ábyrgð á árásunum.
Rússnesk stjórnvöld töldu að aðskilnaðarsinnar mundu láta til sín taka á fundi G-8 ríkjanna í Pétursborg sem hefst um næstu helgi.
Forseti héraðsstjórnar Tsjetsjeníu, sem studd er af rússneskum stjórnvöldum, sagðist vona að lát Basajevs markaði endalok baráttunnar gegn vígahópum aðskilnaðarsinna.
