„Megum ekki gefast upp því annars missum við af Meistaradeildarsæti“

Pep Guardiola, knattspyrnustjóri Manchester City, segir að liðið verði að halda áfram, annars eigi það á hættu að komast ekki í Meistaradeild Evrópu á næsta tímabili.

City, sem var einum færri í 80 mínútur, missti niður tveggja marka forystu gegn Wolves í gær og tapaði, 3-2. City er í 3. sæti ensku úrvalsdeildarinnar, 14 stigum á eftir toppliði Liverpool sem á auk þess leik til góða.

Líkurnar á því að City verði Englandsmeistari þriðja árið í röð eru því afar litlar. Guardiola segir að City-menn verði samt að halda ótrauðir áfram.

„Við megum ekki gefast upp því annars náum við ekki Evrópusæti. Við erum vanir að svara fyrir okkur og vera á toppnum. En núna þurfum við að berjast,“ sagði Guardiola eftir leikinn á Molineux í gær.

Næsti leikur City er gegn spútnikliði Sheffield United á heimavelli á morgun. Leikurinn hefst klukkan 18:00.