Southgate þarf ekki að velja á milli Alexander-Arnold og Wan-Bissaka

Bakvörður Manchester United hefur dregið sig út úr enska landsliðshópnum vegna bakmeiðsla.

Aaron Wan-Bissaka hefur spilað vel í fyrstu leikjum sínum með Manchester United en ekkert verður að því að hann fái tækifæri með enska landsliðinu í þessu landsleikjahléi.

Gareth Southgate valdi Aaron Wan-Bissaka í hópinn fyrir leikina á móti Búlgaríu og Kósóvó í undankeppni EM 2020 en Wan-Bissaka varð að draga sig út úr hópnum vegna bakmeiðsla.

Manchester United full-back Aaron Wan-Bissaka has withdrawn from the England squad because of a back injury.

More https://t.co/ZWIbiU769dpic.twitter.com/2zMORtNpfK

— BBC Sport (@BBCSport) September 3, 2019

Aaron Wan-Bissaka spilar því ekki fyrstu A-landsleiki sína í þessu verkefni en hann á að baki þrjá leiki fyrir 21 árs landslið Englendinga.

Í tilkynningu frá enska knattspyrnusambandinu segir að Wan-Bissaka hafi yfirgefið hópinn og snúið aftur heim til síns félags.

Southgate ákvað að kalla ekki á nýjan leikmann í staðinn en í hópnum eru tveir aðrir hægri bakverðir eða þeir Trent Alexander-Arnold frá Liverpool og Kieran Trippier, fyrrverandi leikmaður Tottenham og núverandi leikmaður Atlético Madrid.

Það er ljóst að það er mikil samkeppni um hægri bakvarðarstöðu enska landsliðsins í dag. Kyle Walker hjá Manchester City komst ekki einu sinni í hópinn því Gareth Southgate valdi frekar Wan-Bissaka í fyrsta sinn.

Enska landsliðið spilar við Búlgaríu á Wembley á laugardaginn og mætir síðan Kósóvó þremur dögum síðar á St Mary's, heimavelli Southampton.