Þrír létust í flugslysinu við Múlakot: Tveir eru alvarlega slasaðir

Þrír létust þegar flugvél brotlenti skammt norðan við flugvöllinn í Múlakoti í Fljótshlíð í gærkvöldi. Fimm voru í vélinni en tveir voru fluttir alvarlega slasaðir með þyrlum Landhelgisgæslunnar, TF-EIR og TF-LÍF á Landspítalann í Fossvogi.

Flugvélin sem brotlenti var einkaflugvél. Hún skall til jarðar við Múlakot um klukkan 20:30. Í tilkynningu frá lögreglunni á Suðurlandi segir að líðan þeirra tveggja sem fluttir voru á sjúkrahús sé stöðug. Jafnframt kemur fram að ekki sé unnt að veita frekar upplýsingar að svo stöddu.

Mikið lið björgunarfólks tók þátt í aðgerðum fyrr í kvöld. Fulltrúar frá Rannsóknarnefnd samgönguslysa hafa aðstoðað tæknideild lögreglunnar við vettvangsrannsókn og búist er við að hún geti tekið einhvern tíma.

Þegar flugvélin brotlenti kviknaði eldur í öðrum væng hennar sem slökkviliðsmenn frá Brunavörnum Rangárvallasýslu slökktu.