Íslenski boltinn

Dalvík/Reynir sló Þór úr bikarnum

Ástrós Ýr Eggertsdóttir skrifar
Dalvík/Reynir fór upp úr þriðju deildinni síðasta haust. Í dag slógu þeir út lið sem var í toppbaráttu í Inkassodeildinni allt síðasta sumar.
Dalvík/Reynir fór upp úr þriðju deildinni síðasta haust. Í dag slógu þeir út lið sem var í toppbaráttu í Inkassodeildinni allt síðasta sumar. mynd/dalvík/reynir

Dalvík/Reynir gerði sér lítið fyrir og sló nágranna sína í Þór út úr Mjólkurbikar karla. Fjárðabyggð og Vestri tryggðu sér sæti í 32-liða úrslitunum.

Dalvík/Reynir, sem spilar í annari deild, gerði sér ferð í Bogann á Akureyri og mætti Inkassodeildarliði Þórs.

Þórsarar áttu fyrsta orðið þegar Jónas Björgvin Sigurbergsson skoraði á 17. mínútu. Gestirnir voru hins vegar ekki lengi að jafna metin, Pálmi Heiðmann Birgisson gerði það fjórum mínútum seinna.

Orri Sigurjónsson sá til þess að Þór fór með forystu inn í hálfleikinn með marki á síðustu mínútu venjulegs leiktíma í fyrri hálfleik.

Í seinni hálfleik jafnaði Númi Kárason aftur fyrir Dalvíkurmenn og það var svo Borja Lopez Laguna sem tryggði gestunum sigurinn, lokatölur 3-2 fyrir Dalvík/Reyni.

Fyrir austan mættust Höttur/Huginn og Fjarðabyggð á Fellavelli. Fjarðabyggð spilar í annari deild en Höttur/Huginn í þeirri þriðju.

Það stefndi allt í framlengingu eftir markalausan leik en Guðjón Máni Magnússon vildi ekki spila lengur og í uppbótartíma seinni hálfleiks setti hann tvö mörk og tryggði Fjarðabyggð 2-0 sigur.

Vestri varð þriðja annarar deildar liðið í dag til þess að tryggja sig áfram í næstu umferð með 3-1 sigri á Kára.

Páll Sindri Einarsson kom Vestra á bragðið á 18. mínútu og Pétur Bjarnason bætti tveimur mörkum við áður en flautað var til hálfleiks. Í seinni hálfleik minnkaði Andri Júlíusson muninn fyrir Kára með marki úr vítaspyrnu en nær komust gestirnir ekki og 3-1 sigur Vestra raunin.

Magni lenti ekki í vandræðum með KF og vann öruggan 4-0 sigur.

Aðeins einn leikur er eftir í 2. umferð Mjólkurbikarsins, það er viðureign Völsungs og Tindastóls sem fer fram á Húsavíkurvelli á miðvikudag.

Dregið verður í 32-liða úrslitin í næstu viku.

Úrslit og upplýsingar um markaskorara eru fengnar frá Fótbolta.net.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.