„Tapið í gær mögulega það besta sem gat komið fyrir Liverpool“

Paul Merson, fyrrum leikmaður Arsenal og núverandi sjónvarpsspekingur á Sky Sports, er á því að stuðningsmenn Liverpool ættu bara að vera hálffegnir að detta út úr ensku bikarkeppninnar í gærkvöldi.

Liverpool tapaði þá 2-1 á móti Wolves og er þar með úr leik í báðum bikarkeppnunum á þessu tímabili. Eftir stendur því „aðeins“ eftir enska úrvalsdeildin, þar sem Liverpool er á toppnum, og Meistaradeildin, þar sem Liverpool er komið í sextán liða úrslitin.

„Ég lít svo á að þeir séu bara búnir að losna við einn leik. Þeir fá nú tveggja vikna frí í kringum næstu bikarhelgi til að hlaða batteríin fyrir framhaldið,“ sagði Paul Merson í þættinum The Debate á Sky Sports.

32 liða úrslit ensku bikarkeppninnar fara fram helgina 25. til 28. janúar næstkomandi. Liverpool spilar tvo deildarleiki þangað til á móti Brighton & Hove Albion (12. janúar), Crystal Palace (19. janúar). Liðið mætir svo Leicester City ellefu dögum síðar (30. janúar).

„Liverpool liðið er í ótrúlegri stöðu til að skrifa söguna og vinna titil sem félagið hefur ekki unnið í 29 ár. Menn mega ekki missa sig og fara dreyma um tvennuna heldur verða menn bara að einbeita sér að deildinni,“ sagði Merson.

Liverpool's FA Cup exit "could be the best thing to happen to them", according to Paul Merson.

Read: https://t.co/KHo3MbpB7ppic.twitter.com/OSu8gvqiNh

— Sky Sports Premier League (@SkySportsPL) January 8, 2019

Merson viðurkennir að það sé aldrei gott að tapa tveimur leikjum í röð og það gæti kannski haft áhrif á hugarfar leikmanna Liverpool. Hann hefur samt ekki miklar áhyggjur af því. Aftur á móti sá hann ákveðin merki á lofti í leikmannavali Jürgen Klopp í leiknumk á móti Úlfunum í gærkvöldi.

„Liðið tapaði naumlega á móti Man. City, eina besta liðinu í heimi, og gerði svo níu breytingar fyrir þennan leik. Að mínu mati er þetta tap mögulega það besta sem gat komið fyrir Liverpool,“ sagði Merson.  

Liverpool hafði dottið út úr 4. umferð enska bikarsins undanfarin þrjú ár og dettur út í 3. umferðinni í ár. Bikarkeppnin hefur ekki verið keppnin hans Jürgen Klopp.

Liverpool vann fjóra bikarleiki og komst í undanúrslit ensku bikarkeppninnar á síðasta tímabili sínu undir stjórn Brendan Rodgers 2014-15 en hefur síðan unnið samanlagt þrjá bikarleiki á fjórum tímabilum undir stjórn Jürgen Klopp.