Blóð á sýningarkassanum kann að vera úr öðrum þjófanna

Lögregla í Svíþjóð leitar enn hinna þjófanna sem stálu ómetanlegum konungsdjásnum úr dómkirkjunni í Strängnäs, vestur af Stokkhólmi, í hádeginu á þriðjudag.

Lögregla telur að þjófarnir hafi flúið frá kirkjunni á dömuhjólum og síðar á sjósleðum út á vatnið Mälaren. Samkvæmt heimildum Aftonbladet er möguleiki á að blóð sem fannst á sýningarkassanum, þar sem djásnin voru til sýnis, kunni að tengjast öðrum hvorum þjófanna.

Þjófarnir gripu með sér tvær kórónur og veldishnetti á meðan athygli fólks beindist að sýningu sem fram fór á torginu fyrir framan kirkjuna. Djásnin eru frá fyrri hluta sautjándu aldar og voru eign Karls níunda Svíakonungs og Kristínar hinnar eldri.

Lögregla gerði húsleit á heimili í bænum Åkersberga, norður af Stokkhólmi, í gærkvöldi og í nótt, en samkvæmt heimildum Aftonbladet á ekkert að hafa fundist þar sem tengist ráninu.