Starfið í mikilli hættu þegar þú gerir lið að enskum meisturum

Antonio Conte bættist í dag í hóp fjölda annarra knattspyrnustjóra sem hafa unnið enska titilinn undanfarin ár en hafa síðan misst starfið „stuttu“ síðar.

BBC fór vel yfir þessa þróun mála í morgun eftir að Chelsea tilkynnti formlega um það að félagið væri búið að reka Antonio Conte.

Antonio Conte er þó kominn í hóp með þeim Claudio Ranieri, Jose Mourinho, Alex Ferguson, Roberto Mancini og Carlo Ancelotti sem allir voru búnir að missa starfið ári eftir að þeir unnu enska meistaratitilinn.

Sir Alex Ferguson sker sig þó úr enda ákvað hann að hætta sjálfur með lið Manchester United eftir liðið vann titilinn undir hans vorið 2013.

Frá tímabilinu 2009-10 þá hafa aðeins tveir meistaraþjálfarar lifað lengur en tvö ár í starfi eftir að þeir handléku Englandsbikarinn. Það eru Ferguson (2010-11) og Manuel Pellegrini eftir að hann gerði Manchester City að enskum meisturum 2013-14.

Stjórasætið hefur verið sérstaklega heitt hjá Chelsea en Conte er þriðji stjóri félagsins á síðustu átta árum sem þurft hefur að taka pokann sinn áður en meira en ár var liðið frá því að hann gerði félagið að enskum meisturum.

Þetta er líka mikil breyting frá því sem áður var. Fyrstu sautján tímabil ensku úrvalsdeildarinnar, eða til ársins 2009, þá hætti enginn stjóri með lið sitt ári eftir að hann gerði það að enskum meisturum.

Meistarastjórarnir voru hinsvegar ekki margir á þessum tíma eða aðeins fjórir: Ferguson hjá United (11 titlar), Arsene Wenger hjá Arsenal (þrír titlar), Mourinho hjá Chelsea (tveir titlar) og Kenny Dalglish hjá Blackburn (einn titill).

Meistaraþjálfarar og framhald þeirra hjá félaginu:

2009-10    Carlo Ancelotti (Chelsea) - Rekinn í lok næsta tímabils

2010-11    Alex Ferguson (Man. United) - Stýrði liðinu í tvö ár og hætti svo sjálfur

2011-12    Roberto Mancini (Man. City) - Rekinn í lok næsta tímabils

2012-13    Alex Ferguson (Man. United) - Hætti sjálfur eftir tímabilið

2013-14    Manuel Pellegrini (Man. City) - Var með liðið í tvö ár til viðbótar

2014-15    Jose Mourinho (Chelsea) - Rekinn í desember

2015-16    Claudio Ranieri (Leicester) - Rekinn í febrúar

2016-17    Antonio Conte (Chelsea) - Rekinn í lok næsta tímabils

2017-18    Pep Guardiola (Man. City) - ???