Árásarmaðurinn í Texas hafði áður hlotið dóm fyrir að brjóta höfuðkúpu stjúpsonar síns

Devin Patrick Kelley sem myrti 26 kirkjugesti í kirkju í Sutherland Springs í Texas í gær var leiddur fyrir herdómstól árið 2012 fyrir að ráðast á eiginkonu sína og höfuðkúpubrjóta kornungan son hennar.

Kelley var 26 ára fyrrverandi hermaður sem var í herþjónustu í Nýju-Mexíkó. Kelley viðurkenndi brotið og var dæmdur í tólf mánaða einangrunarvist og var lækkaður í lægstu tign hersins. Eftir að einangrunarvistinni lauk var hann rekinn með vansæmd úr hernum.

Kelley skildi við þáverandi eiginkonu sína eftir árásina en hann gifti sig aftur árið 2014.

Neikvæður trúleysingi

Gamlir skólafélagar Kelley segja að hann hafi verið mjög neikvæður á Facebook síðu sinni, og skrifað mikið þar um trúleysi og byssur. Eftir að hann var rekinn úr hernum starfaði hann sem aðstoðarmaður í kristilegum skóla en á síðustu árum virðist sem svo að hann hafi snúið baki við trúnni.

Kelley var klæddur svörtum fötum og með grímu með hvítri hauskúpu á þegar hann réðst inn í kirkjuna á sunnudaginn, vopnaður þremur byssum. Hann myrti 26 kirkjugesti.

Nágranni kirkjunnar greip byssuna sína þegar hann sá Kelley fara að bílnum sínum eftir árásina, Kelley kastaði þá rifflinum sínum á jörðina fyrir utan kirkjuna og flúði af vettvangi. Nágranninn og annar maður sem var viðstaddur veittu honum eftirför og skutu að honum.

Kelley fannst svo látinn í bílnum sínum um tólf kílómetra frá kirkjunni. Yfirvöld telja að hann hafi svipt sig lífi.

Óvíst hver ásetningur Kelley var

Ekki er vitað hvað vakti fyrir Kelley en ríkisstjóri Texasríkis, Greg Abbott, sagði að hann telji að árásin á kirkjuna hafi ekki verið af handahófi. „Ég held að það sé ástæða fyrir því að tilræðismaðurinn hafi valið þessa kirkju,“ segir Abbott.

Yfirmaður Almannavarna Texas sagði á blaðamannafundi í dag að deilur hefðu staðið innan fjölskyldu Kelley. Vitað er að tengdamóðir hans hafi sótt kirkjuna reglulega.