Neil Warnock: „Gylfi er besti miðjumaðurinn í úrvalsdeildinni“

Neil Warnock, knattspyrnustjóri Cardiff í ensku B-deildinni, virðist ástfanginn, eða svona allt að því, af íslensku miðjumönnunum Gylfa Þór Sigurðssyni og Aroni Einari Gunnarssyni. Nú segir hann Gylfa þór vera besta miðjumann ensku úrvalsdeildarinnar.

Warnock tók við liði Cardiff í haust og var ekki lengi að gera Aron Einar að sínum aðalmanni. Þeir félagarnir virðast skapaðir fyrir hvorn annan en landsliðsfyrirliðinn blómstrar undir stjórn Warnocks.

Sjá einnig:Gylfi Þór: „Vil ekki vera með fall úr úrvalsdeildinni á ferilskránni“

„Hann er draumur knattspyrnustjórans,“ sagði Warnock um Aron Einar í nóvember en sjálfur er miðjumaðurinn klettharði að norðan meira en sáttur við komu þessa reynda knattspyrnustjóra. Hann ræddi komu hans við Heiðar Helguson, fyrrverandi landsliðsmanns, sem áður var undir stjórn Warnocks hjá QPR.

„Ég heyrði í honum og hann sagði djöfulsins veisla! Þá vissi ég nokkurn veginn að þetta væri maður sem kæmi til með að fíla mig í tætlur og öfugt. Heiðar sagði að ef þú leggur þig fram fyrir hann, þá dýrkar hann þig,“ sagði Aron Einar í Messunni á Stöð 2 Sport HD.

Í dag beindi Warnock orðum sínum að Gylfa Þór Sigurðssyni þegar hann var spurður um ráðningu úrvalsdeildarliðsins Swansea á nýja stjóranum Paul Clement sem kom frá Bayern München. Warnock sat blaðamannafund fyrir bikarleiki helgarinnar.

„Mér líkar vel við Paul Ég hitti hann þegar hann var hjá Derby. Hann er vel máli farinn og skemmtilegur maður. Það er ekki auðvelt að þjálfa Derby þannig ég er viss um að hann tekur þá reynslu með sér til Swansea,“ sagði Warnock um nýja stjórann áður en hann talaði svo um leikmenn Swansea.

Sjá einnig:Gylfi Þór á janúarlista með Griezmann, Payet, Van Dijk og Aubameyang

„Ef ég mætti velja einn leikmann í ensku úrvalsdeildinni væri það Jefferson Montero. Ég elska hann. Svo eru þeir með Wayne Routhledge sem spilaði fyrir mig. Hann getur búið til eitthvað úr engu.“

„Svo ertu [með hjá Swansea] besta miðjumanninn í deildinni sem er Gylfi Þór Sigurðsson þannig þarna ertu með góðan grunn,“ sagði Neil Warnock.

Enski stjórinn er ekkert að bulla. Gylfi Þór er búinn að skora fimm mörk og leggja upp sex fyrir Swansea á tímabilinu en síðast lagði hann upp fyrra mark liðsins í 2-1 sigri á Crystal Palace á útivelli í vikunni.

Síðan árið 2014 er aðeins einn miðjumaður í deildinni sem hefur komið að fleiri mörkum en Gylfi Þór Sigurðsson eins og lesa má hér. Það er Sadio Mané, leikmaður Liverpool, sem er nú meiri framherji.

Gylfi Þór og félagar eiga næst bikarleik gegn Hull á útivelli um helgina.