Yaya Toure tekinn ölvaður undir stýri

Lögreglan í Manchester gaf það út að Yaya Toure, miðjumaður Manchester City hafi verið stöðvaður af lögreglu er hann keyrði bifreið sína undir áhrifum áfengis í síðustu viku.

Toure sem sneri aftur í lið Manchester City á dögunum eftir að hafa verið í skammarkróknum hjá Pep Guardiola kom inn af bekknum í 1-3 tapi gegn Chelsea í gær.

Sjá einnig:Fjögur mörk og tvö rauð í áttunda sigri Chelsea í röð | Sjáðu mörkin

Var hann stöðvaður af lögreglunni í Dagenham á mánudaginn síðastliðinn og var hann ákærður fyrir akstur undir áhrifum áfengis daginn eftir. Þarf hann að mæta fyrir framan dóm þann 13. desember næstkomandi.

Þetta vekur athygli á Englandi þar sem Toure neitaði á sínum tíma kampavínsflösku í beinni útsendingu sem maður leiksins þegar hann sagðist ekki drekka áfengi vegna trúar sinnar.