Vardy: Ég er ánægður hjá Leicester

Jamie Vardy, nýkrýndur Englandsmeistari með Leicester, er ekkert að horfa í kringum sig og bíða eftir tilboði frá einhverju stórliði í sumar.

Vardy hefur átt frábæra leiktíð og er sem stendur næstmarkahæsti leikmaður ensku úrvalsdeildarinnar ásamt Sergio Agüero með 24 mörk.

„Ég er nýbúinn að vinna deildina og spila í Meistaradeildinni á næstu leiktíð,“ sagði Vardy í dag við opnun V9-knattspyrnuskólans sem hann stendur fyrir.

„Ég er ánægður hérna. Eins og við höfum sagt áður erum við eins og bræður. Við erum ekki bara vinir á æfingasvæðinu og hittumst svo daginn eftir. Við erum alltaf að tala saman og fara út að borða saman. Andinn í búningsklefanum er það sem skilaði okkur þessum árangri.“

Leicester þarf að styrkja hópinn fyrir næsta tímabil enda mun liðið fá enn meiri samkeppni um Englandsmeistaratitilinn auk þess sem það verður í Meistaradeildinni.

„Það verður talað um hina og þessa í allt sumar. Að mínu mati, miðað við hvað hópurinn er sterkur innan sem utan vallar, er best að halda honum eins lítið breyttum og hægt er,“ sagði Jamie Vardy.