Zlatan: Lið á Englandi hafa sýnt mér áhuga

Zlatan Ibrahimovic, framherji Paris Saint-Germain og sænska landsliðsins, segir að lið í ensku úrvalsdeildinni hafi sýnt honum áhuga.

Samningur Zlatans við PSG rennur út í sumar og England hefur verið nefnt til sögunnar sem næsti áfangastaður á ferli hans.

„Það er áhugi til staðar. Ég get staðfest það,“ sagði Zlatan sem verður 35 ára í október.

„Þetta er stærsta og vinsælasta deild í heimi. Þegar öll spilin hafa verið lögð á borðið tek ég ákvörðun. Þetta er eins og í hjónabandi. Báðir aðilar verða að vera ánægðir.“

Zlatan segir afar ólíklegt að hann verði áfram í herbúðum Frakklandsmeistara PSG.

„Samningurinn minn rennur út í lok júní. Eins og staðan er í dag verð ég ekki lengur hjá félaginu. Við eigum ekki í viðræðum,“ sagði Zlatan sem hefur ekki miklar áhyggjur af því að hann verði í vandræðum með að finna sér nýtt lið til að spila með.

„Við sjáum hvaða kostir bjóðast og þeir verða eflaust margir. Framtíðin lítur mjög vel út. Það á margt eftir að gerast í sumar svo þetta snýst um að sýna þolinmæði. Það verður örugglega eitthvað til að skrifa um.“

Zlatan hefur skorað 141 mark í 169 leikjum fyrir PSG síðan hann kom til félagsins frá AC Milan 2012 en á þessum tíma hefur liðið fjórum sinnum orðið franskur meistari.