Gylfi hetja Swansea í fallslagnum | Sjáðu markið

Gylfi Þór Sigurðsson tryggði Swansea City gríðarlega mikilvægan 1-0 sigur á Norwich City í fallslag í ensku úrvalsdeildinni í dag.

Gylfi skoraði eina mark leiksins á 61. mínútu. Íslenski landsliðsmaðurinn fékk þá sendingu frá Leroy Fer og lagði boltann í fjærhornið framhjá John Ruddy í marki Norwich.

Markið má sjá í spilaranum hér að ofan.

Þetta var áttunda deildarmark Gylfa á tímabilinu en sex þeirra hafa komið eftir áramót. Hann er markahæsti leikmaður Swansea í deildinni ásamt André Ayew.

Swansea er nú komið með 33 stig og heilum níu stigum frá fallsæti.

Norwich er hins vegar í 18. sæti deildarinnar með 24 stig, einu stigi frá öruggu sæti.