Van Gaal: Sigurinn er ekki mikilvægur fyrir mig, heldur félagið

„Sigurinn er ekki mikilvægur fyrir mig, hann er mikilvægur fyrir félagið, leikmennina og liðið,“ sagði Louis van Gaal, knattspyrnustjóri Manchester United, eftir sigurinn á West Ham í endurteknum leik í 8-liða úrslitum ensku bikarkeppninnar í kvöld.

United mætir Everton í undanúrslitunum en þetta er eini möguleiki liðsins á titli í vetur.

„Ég sagðist vilja vinna titil og ég er mjög ánægður. Þetta er mjög mikilvægt fyrir félagið,“ sagði Hollendingurinn sem kvaðst ánægður með varnarleik United í leiknum.

„Við spiluðum mjög góða vörn og gáfum ekki mörg færi á okkur. Þeir misstu boltann oft og með aðeins meiri yfirvegun hefðu við getað klárað leikinn mun fyrr.“

Sjá einnig: Verðmæti Manchester United hefur hrunið á þessu tímabili

United mætir botnliði Aston Villa á Old Trafford á laugardaginn í næsta leik sínum í ensku úrvalsdeildinni.