Vill taka suðurríkjafánann niður

Nikki Haley, ríkisstjóri Suður-Karólínu, hefur kallað eftir því að fáni Suðurríkjanna verði tekinn niður við þinghús ríkisins í Columbia. Hún sagði fánann vera tákn haturs og aðskilnaðar. Tveir þriðju þingmanna ríkisins þurfa að samþykkja að fáninn sé tekinn niður.

Í kjölfar ódæðis Dylann Roof, sem myrti níu manns í kirkju í Charleston, hefur mikil umræða myndast um fánann, hvað hann táknar og jafnvel hvort að banna eigi fánann.

„Morðinginn sem situr nú í fangelsi sagðist vonast til þess að verk hans leiddi til kynþáttastríðs. Við höfum nú tækifæri til að sýna að hann hafði ekki bara rangt fyrir sér, heldur sé hið andstæða að gerast,“ sagði Nikki Haley við blaðamenn í gærkvöldi. Við hlið hennar stóðu bæði demókratar og repúblikanar.

„Ég vonast til þess að með því að fjarlæga þetta tákn sem sundrar okkur, getum við farið fram á veg í sátt og samlyndi og við getum heiðrað þær níu sálir sem nú eru í himnaríki.“

Yfirlýsing ríkisstjórans virðist hafa komið hreyfingu á málið. Forseti þingsins í Mississippi hefur lagt til að suðuríkjafáninn verði fjarlægður af fána Mississippi, en hann er fyrsti hátt setti repúblikaninn í ríkinu til að stinga upp á því.

Í Tennessee hafa þingmenn beggja flokka lagt til að stytta af hershöfðingjanum Nathan Bedford Forrest verði fjarlægð úr þingsal. Hann var einnig einn af leiðtogu Ku Klux Klan. Þar að auki hefur Wal-Mart tilkynnt að hætt verði að selja vörur með fánanum á í verslunum fyrirtækisins.

Mikil lagaflækja

Samkvæmt lögum Suður-Karólínu er mjög erfitt að taka fánann niður, en hann var settur upp á toppi þinghússins árið 1960. Það var gert til að mótmæla mannréttindahreyfingu svartra í Bandaríkjunum á þeim tíma. Eftir mikil mótmæli var fáninn færður árið 2000 af húsinu og settur upp við styttu þar nærri. Það var gert vegna samkomulags á milli svartra þingmanna og repúblikana.

Það samkomulag hefur séð til þess að fána Suðurríkjanna er aldrei flaggað í hálfa stöng, þrátt fyrir að fána Bandaríkjanna og Suður-Karólínu sé flaggað í hálfa stöng.

Á vef Time segir að tveir þriðju þingmanna ríkisins þurfi að samþykkja slíkt, sem er hærri meirihluti en þarf til að semja fjárhagsáætlun. Hinsvegar væri hægt að breyta þeim lögum og gera skilyrðið einfaldan meirihluta.

Meðal þeirra repúblikana sem hafa kallað eftir því að fáninn verði fjarlægður eru Mitt Romney og Jeb Bush. Þá hefur fjöldi fólks skrifað undir undirskriftarlista um að fáninn verði fjarlægður.

AP fréttaveitan segir frá því að síðasti ríkisstjóri Suður-Karólínu sem kallaði eftir því að fáninn yrði fjarlægður hafi verið repúblikaninn David Beasley. Honum var bolað úr starfi árið 1998 af samtökum afkomenda hermanna Suðurríkjanna.

Niðurstöður 852 manna könnunar sem framkvæmd var í nóvember í fyrra sýndi fram á að 42 prósent íbúa Suður-Karólínu hafi viljað halda fánanum og að 26 prósent hafi viljað fjarlægja hann.