Áttundi knattspyrnustjórinn sem er rekinn í ensku b-deildinni

Það eru bara liðnir þrír mánuðir af tímabilinu í ensku b-deildinni en samt hafa 33 prósent félaga deildarinnar gripið til þess ráðs að skipta um knattspyrnustjóra.

Gary Bowyer varð í gær áttundi stjóri ensku b-deildarinnar til að taka pokann sinn þegar Blackburn Rovers rak knattspyrnustjórann sinn.

Fjórir af þessum átta knattspyrnustjórum voru reknir á fyrstu tíu dögunum í nóvembermánuði og aðeins eitt af þessum fjórum félögum er búið að finna nýjan varanlegan knattspyrnustjóra.

Meðal þeirra sem hafa verið reknir eru Guy Luzon, knattspyrnustjóri Jóhanns Berg Guðmundssonar hjá Charlton Athletic og Steve Evans, fyrrum knattspyrnustjóri Kára Árnasonar hjá Rotherham United.

Steve Evans var reyndar ekki lengi að finna starf því hann tók við liði Leeds United aðeins tuttugu dögum eftir að hann var rekinn frá Rotherham United.

Knattspyrnustjóri Rotherham United er hinsvegar Neil Redfearn sem var einmitt rekinn frá Leeds United í maí.

Brentford, fyrsta félagið til að reka knattspyrnustjórann, er eins og er í 11. sæti deildarinnar en það er óhætt að segja að stjórabreytingin hafi gengið upp því liðið er með fjóra sigra og aðeins eitt tap í síðustu sex leikjum sínum.

Leeds United hefur líka unnið tvo síðustu leiki sína undir stjórn Steve Evans og er komið upp í 15. sæti.

Það gengur aftur á móti áfram ekkert hjá Charlton Athletic eða Rotherham United sem voru hin tvö félögin sem skiptu um knattspyrnustjóra í október.



Knattspyrnustjórar sem hafa misst starfið á þessu tímabili í ensku b-deildinni:

1. Brentford - Marinus Dijkhuizen (28.september)

2. Rotherham United - Steve Evans (28.september)

3. Leeds United - Uwe Rösler (10. október)

4. Charlton Athletic - Guy Luzon (24. október)

5. Huddersfield Town - Chris Powell (4. nóvember)

6. Queens Park Rangers - Chris Ramsey (4. nóvember)    

7. Fulham - Kit Symons (8. nóvember)    

8. Blackburn Rovers - Gary Bowyer (10. nóvember)