Milner: Styttist í fyrsta sigurinn

James Milner, miðjumaður Liverpool, segir styttast í fyrsta sigur liðsins undir stjórn Þjóðverjans Jürgen Klopp sem tók við Liverpool af Brendan Rodgers.

Liverpool gerði 1-1 jafntefli við Southampton í gær, en það var þriðja jafnteflið í röð síðan Klopp tók við.

Liverpool er nú búið að gera jafntefli í átta af 14 leikjum liðsins á leiktíðinni og hefur ekki unnið leik síðan það lagði botnlið Aston Villa í lok september.

Þrátt fyrir gengi liðsins hefur Milner fulla trú á því Liverpool fari að vinna leiki undir stjórn Þjóðverjans.

„Það er ekki langt í þetta,“ sagði Milner eftir jafnteflið í gær þar sem Sadio Mané bjargaði stigi fyrir gestina frá suðurströndinni.

„Við erum bara búnir að tapa tveimur leikjum á þessu ári en gera átta jafntefli í síðustu níu leikjum eða eitthvað fáránlegt.“

„Okkur finnst við geta spilað betur en við erum samt ekki að tapa. Svona ef við lítum á jákvæðu hliðina. Við erum ekki langt frá því að vinna leik. Við vitum að við þurfum að bæta okkur og það munum við gera,“ segir James Milner.