Margt vitlausara en að veðja á jafntefli í næsta Liverpool-leik

Liverpool hefur ekki tapað í 43 daga og í samtals níu leikjum í öllum keppnum. Ekki slæm tölfræði en hún segir ekki alla söguna.

Í þessum níu leikjum hefur Liverpool-liðið aðeins unnið tvisvar þar af annan leikinn í vítakeppni. Það er ekki eins góð tölfræði.

Liverpool missti fyrsta heimaleik Jürgen Klopp í ensku deildinni á Anfield niður í jafntefli og hefur nú gert jafntefli í fyrstu þremur leikjum sínum undir stjórn Þjóðverjans.

Jürgen Klopp hefur því aldrei tapað sem knattspyrnustjóri Liverpool en hann hefur heldur aldrei fagnað sigri heldur.

Jafntefli á móti Southampton var áttunda jafntefli Liverpool-liðsins í síðustu níu leikjum í öllum keppnum.

Liðið hefur nú gert jafntefli í öllum þremur leikjum sínum í Evrópudeildinni og í 5 af 10 leikjum sínum í ensku úrvalsdeildinni.

Í þessum tveimur aðalkeppnum er Liverpool með fimm fleiri jafntefli en sigra. Þótt að töpin séu bara tvö talsins situr liðið í 9. sæti ensku úrvalsdeildarinnar sex stigum frá Meistaradeildarsæti.

Það er margt vitlausara en að veðja á jafntefli í næsta leik Liverpool en stuðullinn á Lengjunni hlýtur líka að lækka með hverjum jafnteflisleiknum.

Næsti leikur liðsins er í enska deildabikarnum á miðvikudagskvöldið þegar nýliðar Bournemouth koma í heimsókn og laugardaginn á eftir heimsækir Liverpool Englandsmeistara Chelsea á Brúna.



Úrslit í síðustu 9 leikjum Liverpool:

17. september: 1-1 jafntefli við Bordeaux

20. september: 1-1 jafntefli við Norwich

23. september: 1-1 jafntefli við Carlisle (Liverpool vann 3-2 í vító)

26. september: 3-2 sigur á Aston Villa

1. október: 1-1 jafntefli við Sion

4. október: 1-1 jafntefli við Everton

17. október: 0-0 jafntefli við Tottenham

22. október: 1-1 jafntefli við Rubin Kazan

25. oktbóer: 1-1 jafntefli við Southampton