Gylfi: Frábær sigur fyrir liðið

Gylfi Þór Sigurðsson skoraði frábært mark beint úr aukaspyrnu í endurkomusigri Swansea City á útivelli á móti Aston Villa í ensku úrvalsdeildinni um helgina.

Aston Villa komst yfir í leiknum en Gylfi kom Swansea inn í leikinn með aukaspyrnumarki sínu áður en André Ayew tryggði Swansea öll þrjú stigin með því að skora sigurmarkið.

„Þetta var mikilvægur sigur fyrir okkur ekki síst eftir að við lentum 1-0 undir," sagði Gylfi Þór Sigurðsson í viðtali við BBC.

„Við sýndum karakter sem lið með því að vinna okkur inn í leikinn og ná síðan sigrinum í lokin," sagði Gylfi. Gylfi jafnaði metin á 68. mínútu en Jordan Ayew kom Villa liðinu yfir sex mínútum áður.

„Við komum okkur aftur inn í leikinn með þessu aukaspyrnumarki og svo breyttum við aðeins leikskipulaginu eftir að Mo [Modou Barrow] kom inná. Hann gaf okkur mikinn hraða út á væng. Við héldum áfram og vissum að við myndum fá færi," sagði Gylfi. Sigurmark André Ayew kom þó ekki fyrr en þremur mínútum fyrir leikslok.

„Þetta var frábært sigur fyrir okkur því síðustu vikur hafa verið erfiðar. Við höfum ekki verið að vinna leiki eða að fá mörg stig," sagði Gylfi. Þetta var fyrsti sigur Swansea-liðsins síðan að liðið vann Manchester United 30. ágúst síðastliðinn.

„Við setjum pressu á okkur sjálfa og höfum sett okkur markmið á þessu tímabili sem við ætlum að ná. Auðvitað höfum við ekki verið ánægðir með frammistöðu undanfarna tvo mánuði," sagði Gylfi.

Swansea var fyrir sigurinn á Aston Villa búið að spila fimm deildarleiki í röð án þess að vinna og hafði aðeins náð í tvö stig af fimmtán í boði.

„Stundum spilar liðið ekki nógu vel en nær samt að vinna leikinn. Þetta snýst um að klára svoleiðis leiki og á meðan við vinnum eru allir ánægðir," sagði Gylfi.

„Það hafa komið leikir hjá okkur þar sem við erum langt frá okkar besta en það eina sem við getum gert er að æfa vel og treysta því að þetta fari að detta fyrir okkur. Dagar eins og þessi á móti Aston Villa hjálpa upp á sjálfstraustið og vonandi getum við byggt ofan á þennan sigur," sagði Gylfi.