Wenger ánægður með Coquelin og Bellerín

Arsenal hefur verið heitasta lið ensku úrvalsdeildarinnar eftir áramót en Skytturnar hafa unnið sjö deildarleiki í röð og 10 af síðustu 11 leikjum sínum.

Hector Bellerín og Francis Coquelin eru meðal leikmanna Arsenal sem hafa spilað eins og englar í undanförnum leikjum en fæstir áttu eflaust von á því að þeir yrðu í lykilhlutverkum í liði Skyttanna í vetur. Meðal þeirra er Arsene Wenger, knattspyrnustjóri Arsenal.

„Í hreinskilni sagt hefði mig ekki órað fyrir því að Coquelin yrði fastamaður í liðinu. En starf mitt felst í því að vera opinn fyrir öllum möguleikum og taka ákvarðar þegar þess gerist þörf,“ sagði Wenger.

Umræddur Coquelin lék sem lánsmaður með B-deildarliði Charlton Athletic fyrra hluta tímabils en var kallaður aftur til baka vegna meiðsla í herbúðum Arsenal. Frakkinn hefur síðan þá fest sig í sessi hjá Skyttunum en hann gegnir mikilvægu hlutverki aftast á miðjunni hjá liðinu.

Bellerín hefur einnig komið eins og stormsveipur inn í lið Arsenal og skorað tvö mörk í 13 deildarleikjum fyrir Skytturnar. Wenger er einnig hæstánægður með framlag Spánverjans sem kom til Arsenal frá Barcelona aðeins 16 ára gamall.

„Frammistaða Bellerín er eitt af því óvæntasta á tímabilinu. Hann var á láni hjá Watford í fyrra og spilaði lítið. Hann er aðeins tvítugur og er þegar orðinn þetta góður,“ sagði Wenger en Bellerín fékk mikið hrós fyrir að halda Raheem Sterling niðri í leik Arsenal og Liverpool á laugardaginn.

„Hann átti í höggi við frábæran leikmann í Sterling,“ sagði Wenger um Spánverjann.

„Ég valdi hann út af hraðanum sem hann býr yfir og einnig vegna þess hversu neðarlega þyngdarpunkturinn er hjá honum. Þessir eiginleikar komu að góðum notum gegn Sterling.

„Hann á eftir að öðlast meiri reynslu en hann er góður að verjast einn á einn og öflugur fram á við,“ sagði Wenger ennfremur en Bellerín skoraði fyrsta mark Arsenal í 4-1 sigrinum á Liverpool. Markið má sjá hér að neðan.

Arsenal mætir Burnley á laugardaginn í næsta deildarleik liðsins.